Ofurhetjur og bæjarfífl

Fátt er Amerískara en ofurhetjur sem hvað eftir annað bjarga heiminum (eða að minnsta kosti Bandaríkjunum) frá glötun með einstaklingsframtakinu einu saman þótt þær eigi jafnan við ofurefli að etja.  Með óbilandi hugrekki sigrast þær á glæpónum, kommum og guðleysingjum og sjá til þess að réttlætið, frelsið og Amerísk gildi séu ætíð varin.
Allar betri borgir eiga sína hetju, svo sem Gotham, Smallville og Metropolis.

Ég er svo heppinn að eiga heima í borg sem á sína eigin ofurhetju sem birtist jafnan á vorin eins og Lóan og berst gegn illum öflum á sinn sérstaka hátt.  Á veturna heitir hann John Fillah og vinnur sem verkamaður.  John er rúmlega fertugur, yfir 190 á hæð og um 130 kg.  Sagan segir að hann sé fyrrverandi landgönguliði (US Marine) sem barðist í flóabardaga I.
Á sumrin birtist hann svo sem "St. Cloud Superman".  Hann stendur allan daginn á fjölförnum gatnamótum víðs vegar um bæinn, íklæddur súperman-búning, með stóran Amerískan fána og stereógræjur sem hann notar til að spila Súperman lagið og önnur ættjarðarlög.  Hann veifar til allra bílanna sem keyra framhjá og uppsker að launum annaðhvort létt flaut eða miðfingurinn.  Hann býður svo vegfarendum uppá að taka mynd af sér með honum gegn $5 gjaldi.

Aðspurður í útvarpsviðtali hjá Minnesota Public Radio sagðist hann hafa byrjað á þessu eftir 11. september 2001 vegna þess að... "I'd say my first purpose is to represent truth, justice, and the American way, which is what Superman basically stands for. And because of the terrorist attack and because of all the corruption in our society and so forth, I think that it's very important that we revitalize that image, and I think it's very important that we all unite, all Americans who love justice and truth."

Ekki eru allir þó jafn ánægðir með St. Cloud Superman.  Hann á það víst til að brjúka kjaft við vegfarendur sem gera grín að honum og hefur margsinnis verið kærður fyrir kynferðislegt áreiti.  Lögreglan hefur margsinnis þurft að hafa afskipti af honum fyrir "disorderly conduct" og "civil disturbance".  Þá hefur Dairy Queen skyndibitastaðurinn fengið úrskurðað lögbann á hann og má hann ekki standa á gatnamótum Division Street og 25th Avenue því hann ónáðar og fælir frá viðskiptavinina.

Hvað svo sem því líður er alltaf gaman að sjá að hann sé kominn á kreik, því það táknar jú að það er komið vor.  Svona furðufuglar lífga líka alltaf svolítið uppá tilveruna og hversdagsleikann.

Að lokum er hér smá vídeó frá St. Cloud...enginn Superman sjáanlegur samt.   

Vorið er komið

Minnesota er loksins að vakna úr vetrardvala.  Síðustu snjóskaflarnir horfnir, brum á trjám og vötnin að þiðna.  Íkornarnir komnir á kreik, fuglarnir syngja og fyrstu flugurnar farnar að sveima. 

Árstíðirnar breytast eins og hendi sé veifað.  Í fyrradag voru ennþá íshrönglar á Mississippi fljótinu.  Í dag var hitastigið svo komið uppí 27°C.   Langþreyttir á kulda og vetri, tóku kennarar og nemendur St. Cloud State University sig til og færðu kennslustundir sínar út undir bert loft.  Campusinn iðaði af lífi sem aldrei fyrr.     En veðrið er fljótt að breytast á þessum árstíma.

Um kvöldmatarleitið sátum við bekkjarsystkinin úti í blíðunni að fara yfir sögu tækniframfara í evrópu á miðöldum.  Þegar umræðan snérist að Galíleó Galilei og ofsóknum kaþólsku kirkjunnar gegn honum dróg allt í einu ský fyrir sólu og kaldur gustur þeytti glósum útum víðan völl.  Á einum klukkutíma lækkaði hitastigið úr 81F (27°C) niður í 55F (12°C).  Almennilegur "cold-front" það!

 

 

 

 

St. Cloud State University er einn af þessum litlu ríkisháskólum sem fáar sögur fara af.  Þrátt fyrir það eru hér 16 þúsund nemendur, þar af um eitt þúsund útlendingar frá 95 löndum.  Okkur útlendingunum er boðin niðurfelling á stórum hluta skólagjaldanna ef við skilum af okkur 50 klst. per önn í nokkurs konar samfélagsþjónustu (Cultural Service Hours).  Þetta skilar sér í mun fjölbreyttara mannlífi í þessum annars einstaklega hvíta landshluta.  Stolt skólans er íshokkí-liðið okkar, SCSU Huskies en það spilar í efstu deild NCAA og hefur unnið national titla og alið upp nokkrar NHL stjörnur. 

Frægasti "alumni" skólans er þó sennilega leikarinn Richard Dean Anderson, sem margir kunna að muna eftir sem spæjarinn MacGyver í samnefndum sjónvarpsþáttum frá 9. áratugnum.  Flottur gæi með sítt að aftan   Hann lék svo síðar aðalhlutverkið í sci-fi þáttunum Stargate SG-1.

 

Ron "Tater Salad" White

Ég kíkti nýlega í Orpehum Theater í Minneapolis og sá uppistand grínistans Ron White.   Ron hefur gert garðinn frægan með "The Blue Collar Comedy Tour" hópnum ásamt Jeff Foxworthy, Bill Engvall og Larry the Cable Guy.

Ron er ekta redneck frá Texas og húmorinn eftir því.   

Endilega kíkið á þetta sketch úr showinu hans "You Can´t Fix Stupid" .

Hér eru svo fleiri sketchar frá Comedy Central.

Frjálslyndir: Kristilegur Repúblikanaflokkur?

Í Silfri Egils í dag var Jón Magnússon, sem skipar fyrsta sæti F-listans í Reykjavík, spurður að því hvort "Frjálslyndi" flokkurinn væri að breytast í "kristilegan Repúblikanaflokk".  Svar Jóns Magnússonar var "Ja, ég væri útaf fyrir sig ánægður með það en ég held ég ráði því ekki einn."

Þar höfum við það.

Nýjasta afrek F-listans á Alþingi var að bregða fæti fyrir stofnfrumu-frumvarpið og fyrir það hlutu þeir lof og stuðning "lífsverndarsinnans" Jóns Vals Jenssonar.  

Annars er það ennþá helsta baráttumál F-listans að reyna að vekja upp ótta og hatur á útlendingum og herða innflytjendalöggjöfina.  Ísland fyrir Íslendinga.  Ein Reich, Ein Volk, Ein Führer!

Er "frjálslyndi" réttnefni yfir öfgahægrisinnaðan þjóðernisflokk?  Eru þeir "liberals"?  

Í síðustu skoðanakönnun var fylgi F-listans hrunið niður í 4,4% og samkvæmt því ná þeir ekki inn manni.  En í dag boðaði Jón Magnússon að kosningabaráttan færi nú á fullt skrið og hann þóttist þess fullviss að hann eigi öruggt þingsæti.  Það verður fróðlegt að sjá hvernig fer. 

Man in the Middle

Ég var loksins að ljúka við lestur ævisögu breska NBA körfuboltaleikmannsins, John Amaechi, sem vakti mikla athygli hér vestra um daginn þegar hann kom út úr skápnum, fyrstur NBA leikmanna.  Bókin sem ber titilinn, "Man in the Middle", er afar áhugaverð lesning.  John lýsir uppvaxtarárum sínum í Manchester á englandi, þar sem hann var lagður í stöðugt einelti í skóla vegna stærðar sinnar, litarhátts og fyrir að vera gáfaðari en flestir skólafélagar hans.  Hann hafði aldrei séð körfubolta, þegar hann var plataður á æfingu 17 ára gamall.  Hann var feitur og hafði andúð á íþróttum, en það kom fljótt í ljós að hann hafði mikla hæfileika í körfubolta, og ekki bara vegna hæðar sinnar.  Hann setti sér það gersamlega óraunhæfa takmark að komast í NBA deildina til þess að sanna sig fyrir sjálfum sér og öðrum.  Í bókinni lýsir hann á skemmtilegan hátt hvernig hann náði því takmarki og fyrir körfuboltaaðdáendur er afar upplýsandi að lesa sögur hans frá lífinu í NBA deildinni bakvið tjöldin.  Margar áhugaverðar lýsingar á leikmönnum, þjálfurum, framkvæmdastjórum liðanna og umboðsmönnum.

Umfram allt er þetta þó mannleg saga sem fólk getur lesið án þess að hafa hundsvit á körfubolta, enda fjallar bókin aðallega um lífið og lífsgildin.  John Amaechi starfar nú fyrir góðgerðarsamtök sín á Englandi.  Hann hefur varið tíma sínum og fjármunum sem hann fékk í laun í NBA til þess að byggja aðstöðu fyrir körfubolta-iðkun og félagsmiðstöðvar fyrir krakka á Englandi sem annars eyddu tíma sínum á götunni.  Einnig hefur hann verið talsmaður Human Rights Campaign hér í Bandaríkjunum eftir að hann kom út úr skápnum og tekið þátt í baráttunni fyrir jafnrétti. 

Það vakti töluvert fjaðrafok þegar John kom út úr skápnum og t.d. kom fyrrum NBA stjarnan Tim Hardaway fram í sjónvarpi þar sem hann lýsti yfir hatri sínu á samkynhneigðum með frekar ógeðfelldum hætti.  Ég hvet alla til að kíkja á þetta svar John Amaechi til Tim Hardaway!  Sannur "english gentleman" og frábær fyrirmynd.

Það brugðust fleiri við þessum orðum Hardaways, þar á meðal gamli Star Trek leikarinn George Takei (Zulu) sem sjálfur kom út úr skápnum fyrir ekki alls löngu.  Hann kom fram í kvöldþættinum Jimmy Kimmel Live á ABC sjónvarpsstöðinni með þetta óborganlega "Public Service Announcement"

P.S. Líkt og John Amaechi lýsir því hvernig þetta hatursfulla statement frá Tim Hardaway er í raun jákvætt vegna þess að það opnar augu fólks fyrir vitleysunni og hræsninni í hommahöturunum, vil ég benda á íslenskan hommahatara sem opinberar innræti sitt og hans líka vel og rækilega á bloggi sínu.  Undir fölsku yfirskini "kristinnar trúar" skýtur hann sig og málstað sinn í fótinn hvað eftir annað.  Fólk sem hefur snefil af skynsemi og heilbrigðri hugsun fær andúð á slíkum fyrirlitningarfullum áróðri.  Því hærra sem hann hrópar, því stærri greiða gerir hann okkur "kynvillingunum".

Vil í þessu sambandi líka benda fólki á að lesa þessa grein Þjóðkirkjuprestsins Þóris Jökuls Þorsteinssonar, fyrrum sóknarprests á Selfossi og núverandi "sendiráðsprests" í Kaupmannahöfn þar sem honum er haldið uppi af íslenska ríkinu.

Kafteinn Kirk syngur fyrir George Lucas

Aðeins meira Star Wars grín...   (frá AFI Lifetime Achievement Awards árið 2005)

Annars er Shatner nú betri sem Danny Crane í Boston Legal heldur en nokkurn tíma kafteinn Kirk!

Til hamingju frændi!

Var að horfa á upptöku Gettu Betur þar sem lið Menntaskólans í Kópavogi sigraði með glæsibrag á lokasprettinum og komst þar með í úrslitarimmuna.  Ég er sérlega stoltur af frænda mínum í sigurliðinu Eiríki Knútssyni og vil óska honum, ásamt kópavogsbúum öllum, til hamingju með árangurinn.

Gangi ykkur vel á móti MR!

MK og MR mætast í úrslitum Gettu betur

Empire Brokeback

Aha...grunaði mig ekki!  Það var eitthvað á milli þeirra.  Loksins fáum við að sjá hina átakanlegu en fallegu sögu um forboðnar ástir C-3PO og R2-D2.  Væntanleg í betri kvikmyndahús.

Geimverur í Arizona

Þau tíðindi bárust frá Arizona í dag að fyrrum ríkisstjórinn Fife Symington sagðist vera fullviss um að undarleg ljós sem sáust yfir Phoenix borg árið 1997 hafi í raun verið "geimskip frá öðrum hnetti".

Aldrei áður hefur maður sem gegnt hefur svo háu embætti innan bandaríska stjórnkerfisins látið slíkt út úr sér.  Symington sem var ríkisstjóri Arizona frá 1990-1997 fyrir hönd Repúblikanaflokksins sagðist sjálfur hafa orðið vitni af þessum fljúgandi furðuhlut og sagði það útilokað að þetta hefðu verið blys frá herflugvélum.  Orðrétt sagði hann "It was enormous and inexplicable. Who knows where it came from? A lot of people saw it, and I saw it too. It was dramatic. And it couldn't have been flares because it was too symmetrical. It had a geometric outline, a constant shape."

Hann sagðist ekki hafa getað sagt frá þessari upplifun sinni á meðan hann gegndi embætti því hann hefði ekki viljað skapa ofsahræðslu meðal íbúanna og óttaðist líka að vera talinn brjálaður.  Hann hafi þó fyrirskipað rannsókn á málinu, en flugherinn hefði ekki reynst mjög samstarfsfús.

Það sem gefur áliti Symingtons ef til vill meira vægi er að hann þjónaði í flughernum í Víetnam stríðinu og ætti því að þekkja muninn á ljósum frá flugvél og einhverju allt öðru...

Hér má sjá frétt CNN um málið

$200 aðgangsmiði

Hinn nýji Miklagljúfurs útsýnispallur Indjánahöfðingjanna í Arizona verður sjálfsagt vel sóttur af túrhestum fyrst um sinn þrátt fyrir að aðgangurinn að herlegheitunum kosti á bilinu $49 til $199 eftir því hversu lengi þú nennir að bíða í biðröðinni.  Pallurinn tekur nefnilega ekki nema 120 manns í einu og búist er við yfir 600.000 gestum fyrsta árið.  Verðlagið er því talið eðlilegt í ljósi "supply and demand".

Fyrir þessa upphæð er reyndar hægt að fara í þyrluflug niður á botn gljúfursins, eða eiga góða kvöldstund í spilavítunum í Las Vegas...já eða við hliðina á útsýnispallinum, því blessaðir indjánarnir hugsa sér gott til glóðarinnar þar sem þeir ætla nefnilega að byggja stórt hótel og casínó rétt við gljúfurbakkann, svona til að þjóna útsýnispallsgestunum enn betur!  

Sjálfur held ég að ég láti mér nægja að gægjast fram af gljúfur-barminum fjarri þessari vitleysu næst þegar ég kíki á Grand Canyon.  Fjarri spilavítinu, án þess að bíða í tveggja tíma biðröð og án þess að borga svo mikið sem dollar fyrir það.

Indjánahöfðingjar og fyrrverandi geimfari í 1.200 metra hæð yfir Miklagljúfri