Vorið er komið

Minnesota er loksins að vakna úr vetrardvala.  Síðustu snjóskaflarnir horfnir, brum á trjám og vötnin að þiðna.  Íkornarnir komnir á kreik, fuglarnir syngja og fyrstu flugurnar farnar að sveima. 

Árstíðirnar breytast eins og hendi sé veifað.  Í fyrradag voru ennþá íshrönglar á Mississippi fljótinu.  Í dag var hitastigið svo komið uppí 27°C.   Langþreyttir á kulda og vetri, tóku kennarar og nemendur St. Cloud State University sig til og færðu kennslustundir sínar út undir bert loft.  Campusinn iðaði af lífi sem aldrei fyrr.     En veðrið er fljótt að breytast á þessum árstíma.

Um kvöldmatarleitið sátum við bekkjarsystkinin úti í blíðunni að fara yfir sögu tækniframfara í evrópu á miðöldum.  Þegar umræðan snérist að Galíleó Galilei og ofsóknum kaþólsku kirkjunnar gegn honum dróg allt í einu ský fyrir sólu og kaldur gustur þeytti glósum útum víðan völl.  Á einum klukkutíma lækkaði hitastigið úr 81F (27°C) niður í 55F (12°C).  Almennilegur "cold-front" það!

 

 

 

 

St. Cloud State University er einn af þessum litlu ríkisháskólum sem fáar sögur fara af.  Þrátt fyrir það eru hér 16 þúsund nemendur, þar af um eitt þúsund útlendingar frá 95 löndum.  Okkur útlendingunum er boðin niðurfelling á stórum hluta skólagjaldanna ef við skilum af okkur 50 klst. per önn í nokkurs konar samfélagsþjónustu (Cultural Service Hours).  Þetta skilar sér í mun fjölbreyttara mannlífi í þessum annars einstaklega hvíta landshluta.  Stolt skólans er íshokkí-liðið okkar, SCSU Huskies en það spilar í efstu deild NCAA og hefur unnið national titla og alið upp nokkrar NHL stjörnur. 

Frægasti "alumni" skólans er þó sennilega leikarinn Richard Dean Anderson, sem margir kunna að muna eftir sem spæjarinn MacGyver í samnefndum sjónvarpsþáttum frá 9. áratugnum.  Flottur gæi með sítt að aftan   Hann lék svo síðar aðalhlutverkið í sci-fi þáttunum Stargate SG-1.

 

Athugasemdir

[Kolla, 27.3.2007 kl. 19:55]

Það er svo gott þegar sumarið er að koma. Hérna var klukkunni breytt á sunnudaginn og síðan er búið að vera alveg yndislegt veður.

[Róbert Björnsson, 28.3.2007 kl. 00:50]

Já, þetta er alltaf skemmtilegur árstími.

[Ólafur Þórðarson, 28.3.2007 kl. 02:45]

Vá í sama skóla og MacGyver!! He he. Þú útskrifast og verður einhvers konar súpermaður, spái ég. Mín fyrrverandi fæddist í Aurora Illinois (Waynes World), en að vera í sama hákóla og MacGyver toppar nú allt. Flott í ferilsskránna.

Hér á Austurströndinni var líka flott veður í dag. Var að vinna í nokkrar klst á skrifstofu hjá gömlum skarfi. 18-20c hiti svo ég opnaði alla glugga. Svo kom kallinn aftur utanúr bæ af einhverjum fundi, muldrar eitthvað og lokar gluggunum og setur....loftkælinguna á fullt! Ég meina, þetta er bilun. Er ekki svona slæmt í Minnesota bæjum nema kannski downtown Twin CITIES. þar sem hef ég ekki komið í rúm 20 ár.

[Jón Steinar Ragnarsson, 28.3.2007 kl. 05:06]

Hér á Sigló klæðast trjágrinarnar glitrandi hvítu sindri, sem merlar í mánaljósinu. Þögnin er alger. Ekki einusinni fuglakvak.  Tíminn skrapp vestur um haf, þar sem alltaf er vöntun á honum.  Hér erum við bara ég almættið og stjörnurnar.

[Róbert Björnsson, 28.3.2007 kl. 06:04]

Veffari: Já ef mér tekst að læra jafn vel á svissneska army hnífinn eins og MacGyver þá verð ég í góðum málum!     Ég heyrði annars í loftkælingunni hjá nágranna mínum í gær...svona fólki er ekki viðbjargandi! 

Jón Steinar:  Vildi að ég hefði þína hæfileika í ljóðrænum tilburðum!   Það er ekki öllum gefið að koma með svona lýsingar á umhverfi sínu.  - Annars sá ég að Lóan er komin að kveða burt snjóinn...allavega suður á Eyrarbakka.  Vonandi fer hún að kvaka fyrir þig líka bráðlega.