Klappstýrur

Fara í taugarnar á mér.  Ég hef aldrei skilið hlutverk þeirra á kappleikjum og satt að segja finnst mér klappstýrur vera yfir höfuð sorglega hallærislegar.  Þrátt fyrir að gera lítið til þess að auka á stemmninguna á kappleikjum, né hafa nokkur áhrif á gang leiksins er þetta fyrirbrigði jafn samgróið Bandarískri menningu og eplabaka og hafnabolti.

Strax í grunnskóla er stelpum kennt að þeirra hlutverk á íþróttavellinum sé að dilla sér hálfnaktar með heimskulegt bros á vör, vera sætar og hvetja strákana áfram með asnalegum píkuskrækjum.

Sem jafnréttissinna og hófsömum femínista blöskrar mér að stelpur láti niðurlægja sig á þennan hátt.  Hvar er sjálfsvirðingin?  Mér verður álíka flökurt í hvert sinn sem ég sé svokallaðar fegurðarsamkeppnir, sem er auðvitað ekkert annað en keppni um hver nær að svelta sig mest, fara í nógu marga ljósatíma, og troða nógu miklu sílíkoni á vissa staði.

Svo er það þessi double-standard sem fer í taugarnar á mér varðandi "klámvæðinguna"...klappstýrurnar mega dilla sér á eggjandi hátt framan í unga sem aldna en guð hjálpi Janet Jackson ef það verður smá "wardrobe malfunction" í hálfleik!

Vesturlandabúar saka múslima um kvennakúgun fyrir það að í þeirra heimshluta eru konur ekki hafðar sem sýningargripir.  En er það ekki álíka mikil kvennakúgun að ala stelpur upp í þeirri trú að eina leiðin fyrir þær til þess að ná langt í heiminum sé sú að fá sér sílíkonbrjóst og klæða sig upp eins og hórur?

Æ...ég biðst forláts.  Ætli ég sé ekki bara svona argur yfir því hvað körfuboltaliðinu mínu hefur gengið illa að undanförnu...það er eitthvað svo ergjandi að horfa á liðið sitt 20 stigum undir þegar lítið er eftir og horfa svo á þessar barbí-dúkkur hoppandi um skælbrosandi veifandi þessum asnalegu pom poms!

Samkvæmt Wikipedia var þetta klappstýrufyrirbæri fundið upp hérna í Minnesota af öllum stöðum.  Fyrsta klappstýran var drengur að nafni Johnny Campbell sem var nemandi við Minnesota-háskóla árið 1898, og fyrsti klappstýruhópurinn var einungis skipaður strákum sem ekki komust í fótboltaliðið.  Það var ekki fyrr en á þriðja áratug síðustu aldar að stelpur sem æfðu fimleika fengu að gerast klappstýrur.  Undir lok fimmta áratugsins voru stelpur hins vegar komnar í yfirgnæfandi meirihluta og í dag er hlutfallið komið upp í 97% stelpunum í vil.  En nota bene þeir fáu strákar sem stunda klappstjórn í dag eru kappklæddir!  Hvað á það að þýða?  Ósanngjörn kynjamismunun segi ég nú bara!

Það er athyglisverð staðreynd að George W. Bush var klappstýra á námsárum sínum í Yale.  Það útskýrir kannski margt!

Ok ég verð víst að viðurkenna að ég hefði nú sennilega svolítið gaman af klappstýrum ef þær væru fleiri svona!           Erhm... og þar með fauk púrítana-röksemdarfærslan hér að ofan útum veður og vind...Úps!       Go Minnesota!  Go! 

 

Athugasemdir

[Ragnhildur (IP-tala skráð) 2.4.2007 kl. 17:06]

Ég ætlaði nú að fara að koma með svarið við þessu klappstýru - klíju - sýki þinni þegar þú komst með svarið sjálfur með myndinni þarna neðst.

 Þetta snýst sem sagt um kynin hjá þér.

[Róbert Björnsson, 2.4.2007 kl. 18:44]

Jafnrétti kynjanna Ragnhildur mín!     Það borga allir jafnt inn á leikina og ættu því allir að fá jafn mikið fyrir sinn snúð!   Eða þá að sleppa klappstýrunum og lækka miðaverðið.

Annars vona ég að fólk taki þessa færslu ekki of alvarlega... klappsýrur eru ágætar      Amerískir fótboltastrákar og klappstýrur eiga mjög vel saman, enda gáfnafarið á svipuðu leveli.   Ég sat með þessu liði í bekk á mínu fyrsta ári hérna...og treystið mér, stereótýpurnar í kvikmyndunum eru sko engar ýkjur!

[Teitur Glaumgosi (IP-tala skráð) 2.4.2007 kl. 20:05]

Þú ættir að líta á útúb og finna "Spartan Cheerleaders" með honum Will Ferrel þegar hann var í SNL. Þar fær snúðurinn þinn þá kannski eitthvað ;-)

[Róbert Björnsson, 2.4.2007 kl. 20:48]

Hahaha...Will Ferrell er ágætur...en ekki sem klappstýra.  More cowbell!!!

http://www.youtube.com/watch?v=pBqPHJhmFHo