1. stk. ríkisborgararéttur - kr. 1.300.

Þegar ég varð 18 ára fékk ég sent bréf frá dómsmálaráðuneytinu þar sem mér var tjáð að samkvæmt þjóðskrá væri ég ríkisfangslaus og þyrfti að gjöra svo vel að sækja um íslenskan ríkisborgararétt ef ég vildi halda áfram að njóta réttinda sem íslenskur þegn.

Þetta kom mér nokkuð í opna skjöldu því ég fæddist á þessu blessaða skeri, átti íslenska foreldra (nokkurn vegin), íslenska kennitölu og meira að segja íslenskt vegabréf sem ég hafði margsinnis notað til útlandaferða.

Málið var að afi minn, Robert Jensen mjólkurfræðingur, fæddist í danmörku og fluttist til íslands fyrir stríð til að starfa við Mjólkurbú Flóamanna á Selfossi.  Þar kynntist hann ömmu minni og saman áttu þau pabba gamla...en þar sem hann fæddist fyrir árið 1944 þegar íslendingar sviku kónginn og lýstu yfir sjálfstæði, þá var pabbi (og ég, einhverra hluta vegna sömuleiðis) skildreindur sem svokallaður "fullveldis-dani".  Engu skipti þó ég hefði fæðst árið 1977 og móðir mín væri alíslensk.

Mér þótti þetta nú svo vitlaust að ég beið með að svara þessu og kíkti í danska sendiráðið og spurðist fyrir um hvort þeir vildu taka við ríkisfangslausum landflótta fullveldis-dana...en þeir vildu ekkert með mig hafa bévaðir. 

Svo kom að því að passinn minn var við það að renna út og ég þurfti að komast til útlanda...sýslumaðurinn harðneitaði þá að endurnýja passann og sagði það hafa verið alvarleg mistök að ég hefði yfir höfuð fengið íslenskan passa eins og málum væri háttað.

Þá var ekki annað í stöðunni en að kyngja stoltinu og sækja skriflega um íslenskan ríkisborgararétt.  Sem betur fer nægði mér að senda inn eitt lítið bréf og ég þurfti ekki að ganga í gengum þann langa og mikla prósess sem aðrir "útlendingar" þurfa að ganga í gegnum...senda inn meðmæli (frá flokksgæðingi) og fá alþingi til að samþykkja herlegheitin.  Nei, ég fékk bara tilkynningu um að mæta uppí dómsmálaráðuneyti, þar var ég rukkaður um 1.300 krónur og fékk svo afhent skjal, undirritað af Þorsteini Pálssyni þ.v. dómsmálaráðherra þess efnis að ég væri góður og gildur ríkisborgari, ásamt kvittun sem á stendur "1. stk. ríkisborgararéttur - kr. 1.300."    Skjalinu er ég löngu búinn að týna...en kvittunina held ég mikið uppá enda ekki á hverjum degi sem maður kaupir sér ríkisborgararétt á svona spottprís!  Hehe...ætli raunvirðið hafi eitthvað hækkað í allri verðbólgunni?

24 fá ríkisborgararétt samkvæmt tillögu Alþingis

Vor í lofti

Hér gerði hressilegt þrumuveður í gær ásamt því sem nokkrir hvirfilbylir (skýstrokkar) mynduðust og gerðu mikinn óskunda hér í nágrenninu. 

Hvirfilbylur lagði heilu göturnar í rúst í Coon Rapids og Hugo sem eru úthverfi frá Minneapolis og þar lét tveggja ára barn lífið.  Hér í St. Cloud urðu nokkrar skemmdir af völdum haglélja en höglin voru á stærð við tíkall í þvermál.  Þau voru þó enn stærri í nágrannabæjunum Monticello og Albertville þar sem þessar myndir eru teknar...en þar náðu haglélin stærð á við hafnarbolta.  Alltaf sérstakt að sjá haglél í 28 stiga hita.

 

Mannskæðir skýstrokkar